जेठी सासुको हत्या गर्ने ज्वाईं पक्राउ

इलाम । इलाममा ज्वाइँले धारिलो हतियार प्रहार गरी जेठी सासुको हत्या गरेका छन् । माई नगरपालिका–४ का ४२ वर्षीय शान्तिराम दुलालले  घरायसी विवादको क्रममा भूमिका चापागाईँको हत्या गरेका हुन् । 

 दुलालले चापागाईँको टाउकामा हतियार प्रहार गरी घाइते बनाएका थिए । घाइते चापागाईँलाई उपचारका लागि झापाको बिर्तामोड स्थित वि एन्ड सी अस्पताल लगिएको र  उपचारका क्रममा  मृत्यु भएको इलामका डिएसपी मानबहादुर राईले बताउनु भयो । 

दुलाल र उनकी पत्नी (भूमिकाकी बहिनी) को भने माना चामल सम्बन्धी मुद्दा चलिरहेको जनाइएको छ । केही समय अघि  मुद्दाकै क्रममा अदालत पुगेका दुलाल र चापागाईँ बिच पनि अदालत परिसरमा विवाद भएको थियो ।  

घटनामा संलग्न दुलाललाई प्रहरीले पक्राउ गरि थप  अनुसन्धान गरिरहेको छ।