खोटाङको बराहपोखरी गाउँपालिका उपाध्यक्षसहित १० जनप्रतिनिधिको पद रिक्त

खोटाङ । भदौ ३१ — निर्वाचन आयोगले दल त्याग गरी अन्य राजनीतिक दलमा प्रवेश गरेका दुई गाउँपालिका उपाध्यक्षसहित १० जना स्थानीय तहका निर्वाचित जनप्रतिनिधिको पद रिक्त भएको जनाएको छ।

आयोगले बुधबार सूचना प्रकाशित गर्दै सम्बन्धित स्थानीय तहका निर्वाचित जनप्रतिनिधिले दल त्याग गरेको विवरण प्राप्त भएकाले उनीहरूको पद रिक्त भएको जानकारी दिएको हो।

आयोगका अनुसार मधेस प्रदेशका चार, कोशी प्रदेशका तीन, बागमती प्रदेशका दुई र सुदूरपश्चिम प्रदेशका एक जना जनप्रतिनिधिको पद रिक्त भएको छ।

मधेस प्रदेशमा धनुषाको शहीदनगर नगरपालिका–५ का वडाध्यक्ष तनुकलाल कुसियैत, विदेह नगरपालिका–६ का वडाध्यक्ष जयराम मण्डल, कमला नगरपालिका–५ का वडाध्यक्ष शीबा पासमान र मिथिला नगरपालिका–२ का वडाध्यक्ष बिहारी महतो कोइरी रहेका छन्।

त्यस्तै, कोशी प्रदेशमा खोटाङको केपिलासगढी गाउँपालिका–३ का वडाध्यक्ष तुलाराम राई, बराहपोखरी गाउँपालिकाका उपाध्यक्ष भुवलराज राई र मोरङको धनपालथान गाउँपालिका–५ का वडाध्यक्ष गयानन्द सरदारको पद रिक्त भएको आयोगले जनाएको छ।

बागमती प्रदेशअन्तर्गत दोलखाको जिरी नगरपालिका–६ का वडाध्यक्ष मर्जितबहादुर खड्का र जिरी नगरपालिका–३ का वडाध्यक्ष खेटराज घिमिरेको पदसमेत रिक्त भएको छ।

यसैगरी, सुदूरपश्चिम प्रदेशको कैलालीस्थित बर्दगोरिया गाउँपालिकाका उपाध्यक्ष गणेशराज गिरीको पद पनि दल त्यागका कारण रिक्त भएको आयोगको सूचनामा उल्लेख छ।

आयोगका अनुसार २०७९ सालको स्थानीय तह निर्वाचनमा तत्कालीन नेकपा (माओवादी केन्द्र), नेकपा (एकीकृत समाजवादी) लगायतका राजनीतिक दलबाट निर्वाचित भएका उनीहरू पछि अन्य राजनीतिक दलमा प्रवेश गरेका थिए। सम्बन्धित राजनीतिक दलका केन्द्रीय समितिको निर्णयसहित उनीहरूले दल त्याग गरेको विवरण आयोगमा प्राप्त भएको थियो।

राजनीतिक दलसम्बन्धी ऐन, २०७३ को दफा ३२ को उपदफा (१) तथा राजनीतिक दलसम्बन्धी नियमावली, २०७४ को नियम २२ बमोजिम दल त्याग गरेको देखिएकाले सम्बन्धित स्थानीय तहका निर्वाचित पद रिक्त भएको आयोगले स्पष्ट पारेको छ।

आयोगले नियमावलीको नियम २२ को उपनियम (२) बमोजिम सम्बन्धित सबैको जानकारीका लागि पद रिक्त भएको सूचना प्रकाशित गरेको जनाएको छ।