दिप्रुङ चुइचुम्मा गाउँपालिकालाई पूर्ण खोप सुनिश्चित गाउँपालिका घोषणा ।

खोटाङको दिप्रुङ चुइचुम्मा गाउँपालिकालाई पूर्ण खोप सुनिश्चित गाउँपालिका घोषणा गरिएको छ । "स्थानीय स्वामित्व र सहभागिता, पूर्ण खोप सुनिश्चितता हाम्रो प्रतिबद्धता" भन्ने मूल नाराका साथ गाउँपालिका भित्रका १५ महिना मुनिका सबै लक्षित बालबालिकाहरूले खोपको पूर्ण मात्रा पाएको सुनिश्चित भएपछि शुक्रबार एक भव्य कार्यक्रमका बीच यो घोषणा गरिएको हो । गाउँपालिकाका अध्यक्ष लोकेन्द्र राईको सभाध्यक्षतामा सम्पन्न उक्त ऐतिहासिक घोषणा कार्यक्रममा जिल्ला स्वास्थ्य कार्यालयका प्रमुख कुल बहादुर पौडेल मुख्य अतिथिका रूपमा उपस्थित हुनुहुन्थ्यो ।

कार्यक्रमको विशेष अवसरमा 'हेल्लो डाक्टर' कार्यक्रमका संयोजक तथा स्वास्थ्यकर्मी सुरेश प्रधानलाई नगद पुरस्कार सहित सम्मान गरिएको छ । आफ्नो कार्यक्षेत्रमा उत्कृष्ट कार्यमूल्याङ्कन हासिल गर्न सफल हुनुभएका प्रधानलाई नगद रु २२ हजार २ सय २२ र सम्मान पत्रसहित पुरस्कृत गरियो । यसका साथै, कार्यक्रमलाई थप रोचक र सन्देशमूलक बनाउन स्थानीय महिला स्वास्थ्य स्वयंसेविकाहरूले खोपको महत्त्व र स्वास्थ्य सचेतना सम्बन्धी गीत तथा नृत्यहरू प्रस्तुत गरेका थिए ।

उक्त घोषणा कार्यक्रममा जनप्रतिनिधि र स्वास्थ्य क्षेत्रका व्यक्तित्वहरूको बाक्लो उपस्थिति रहेको थियो । कार्यक्रममा गाउँपालिका उपाध्यक्ष अरुणा थापा मगर र नेपाल कम्युनिष्ट पार्टी (नेकपा) का पूर्व जिल्ला अध्यक्ष राम प्रसाद दंगाल विशेष अतिथिका रूपमा रहनुभएको थियो भने विभिन्न वडाका वडा अध्यक्षहरू, गाउँपालिकाका स्वास्थ्य शाखा प्रमुख मुस्ताक अहमद मन्सुरी र डा. मो. अलि अन्सारी अतिथिका रूपमा उपस्थित हुनुहुन्थ्यो । कार्यक्रममा गाउँपालिकाका विभिन्न शाखा प्रमुख तथा कर्मचारीहरू, सुरक्षाकर्मीहरू, स्थानीय स्वास्थ्यकर्मी र ठुलो संख्यामा महिला स्वास्थ्य स्वयंसेविकाहरूको सहभागिता रहेको थियो । यो घोषणासँगै दिप्रुङ चुइचुम्मा गाउँपालिकाले स्वास्थ्यको क्षेत्रमा एक महत्त्वपूर्ण कोसेढुङ्गा पार गरेको छ र आगामी दिनमा यसको दिगोपनका लागि स्थानीय सरकार प्रतिबद्ध रहने जनाइएको छ ।

कार्यक्रमको समापन गर्दै गाउँपालिका अध्यक्ष लोकेन्द्र राईले नेपालमा वि.सं. २०३४ सालदेखि सुरु भएको खोप सेवाले मातृ तथा बाल मृत्युदर घटाउन अनपेक्षित र ऐतिहासिक सुधार गरेको उल्लेख गर्नुभयो । उहाँले गाउँ, घर र टोल-बस्तीसम्म पुगेर नागरिकलाई आधारभूत स्वास्थ्य सेवा पुर्‍याउन र पालिकालाई पूर्ण खोपयुक्त बनाउन महिला स्वास्थ्य स्वयंसेविकाहरूको भूमिका अतुलनीय रहेको बताउनुभयो । गाउँपालिकाले उहाँहरूको योगदानलाई विगतदेखि नै प्रोत्साहन गर्दै आएको र आगामी बजेटमार्फत पालिकाको स्रोत र साधनले भ्याएसम्म थप सेवा सुविधाहरू वृद्धि गरिने प्रतिबद्धता समेत अध्यक्ष राईले व्यक्त गर्नुभयो ।