राशिफल
सुन चाँदि
युनिकोड
विनिमय दर
मौसम
शेयर बजार
पात्रो
गोरखा । बूढीगण्डकी नदीमा आएको बाढीले गोरखाको उत्तरी क्षेत्रमा ठूलो क्षति पुर्याएको छ । बाढीले दुईवटा मोटरेबल र चारवटा झोलुङ्गे पुल गरी ६ वटा पुल बगाएको छ भने कम्तीमा १० जना सम्पर्कविहीन भएका छन् ।
सहायक प्रमुख जिल्ला अधिकारी नेत्रप्रसाद शर्माका अनुसार बाढीले आरुघाट र धादिङको त्रिपुरासुन्दरी जोड्ने तथा आरुघाटको सोती र मान्बु जोड्ने पक्की पुल बगाएको छ । त्यस्तै, धार्चे गाउँपालिका–१ र ३ जोड्ने बेलिब्रिजसमेत बाढीले बगाएको छ ।
बाढीले माछिखोला र केरौँजा जोड्ने झोलुङ्गे पुल, चुमनुब्रीको ठाडोभर्याङ र जगत् जोड्ने पुल तथा सिर्दिबासको घट्टेखोला र फिलिम जोड्ने झोलुङ्गे पुल पनि बगाएको छ । पुलहरू बगाएपछि प्रभावित बस्तीबीचको आवागमन र सम्पर्कमा समस्या उत्पन्न भएको छ ।
यसैगरी, बाढीले चुमनुब्री गाउँपालिका–३ स्थित पैयुँ र बगर गाउँका करिब ३५ घर बगाएको छ । जगत्, सल्लेरी, दोभान र घट्टेखोला गाउँमा समेत बाढीले क्षति पुर्याएको छ ।
बाढीका कारण स्थानीय बासिन्दा प्रभावित भएका छन् भने सडक तथा पुलको सम्पर्क विच्छेद हुँदा उद्धार र राहत परिचालनमा समेत कठिनाइ हुन सक्ने देखिएको छ ।
कम्तीमा १० जना सम्पर्कविहीन भएको विवरण सार्वजनिक भए पनि उनीहरूको अवस्था र खोजी कार्यको पछिल्लो विवरणबारे थप जानकारी आउन बाँकी छ । बाढीबाट भएको मानवीय तथा भौतिक क्षतिको पूर्ण विवरणसमेत संकलन हुन बाँकी छ ।
Jantedhunga
